ကျွန်ုပ် grade 6 သင်္ချာအတန်းတွင်တက်ရောက်နေစဉ်ကာလ၊ ဖြစ်တန်စွမ်းအကြောင်းကို လေ့လာနေခဲ့စဉ်က ဖြစ်ပါသည်။ ဆရာကစစ်ဆေးပြီး၍ ကျွန်ုပ်တို့ဖြေဆိုထားသောအဖြေလွှာကို ပြန်ပေးပြီးအဖြေများကို ဆက်လက်ရှင်းပြနေခဲ့၏။ ကျွန်ုပ်မှာ မိမိရမှတ်များအပေါ် ဂရုစိုက်သည့် ကျောင်းသားတစ်ဦး ဖြစ်သည့်အပြင် ရိုးရိုးသားသားဝန်ခံရလျှင် grade 6 သမားတစ်ဦးအဖို့ လိုအပ်သည်ထက်ပင်ပိုနေပါသေးသည်။ ထိုတွင် ကျိန်းသေမှန်ကန်စွာဖြေဆိုထားခဲ့ပါသည်ဟု ကျွန်ုပ်အတတ်ပြောနိုင်သည့်မေးခွန်းတစ်ခုအား ဆရာကအမှားပေးထားသည်ကို သတိထားမိသွားပါသည်။ မေးခွန်းမှာအောက်ပါမေးခွန်းမျိုးနှင့် ခပ်ဆင်ဆင်တူပါသည်။
ကလေးလူနာဆောင်အသစ်တစ်ဆောင်ဆောက်လုပ်ရန် ရံပုံငွေအတွက် ဆေးရုံတစ်ခုသည် ထီကံစမ်းမဲတစ်မျိုးကို လုပ်ဆောင်နေ၏။ ဆေးရုံမှထီစောင်ရေ ၅ ၅၀၀ ၀၀၀ ကိုရောင်းချပေးနေပြီး ပေါက်နိုင်ခြေမှာ လေးစောင်ထိုးလျှင်တစ်စောင်နှုန်း ပေါက်ဂဏန်းပါရှိမည်ဖြစ်သည်။ မာရီယာသည် အနည်းဆုံး ထီတစ်စောင်တော့ ပေါက်လိုနေလျှင် ထီလက်မှတ်အရေအတွက်မည်မျှကို ဝယ်ယူရမည်နည်း။
လေးပုံထိုးလျှင် တစ်ပုံပေါက်ဂဏန်းပါမည်ဖြစ်သောကြောင့် ၅ ၅၀၀ ၀၀၀ ကိုလေးပုံပုံသော် တစ်ပုံလျှင် ၁ ၃၇၅ ၀၀၀ စောင်ရှိ၏။ ပေါက်ဂဏန်းမဟုတ်သည့်လက်မှတ်အားလုံးပေါင်းမှာ ၅ ၅၀၀ ၀၀၀ – ၁ ၃၇၅ ၀၀၀ = ၄ ၁၂၅ ၀၀၀ စောင် ဖြစ်မည်။ အဆိုးဆုံးအခြေအနေအတွက်ပါပြင်ဆင်ထားရန် ပေါက်ဂဏန်းမဟုတ်သည့် လက်မှတ်အားလုံးအပြင် နောက်ထပ်ထီလက်မှတ်အပိုတစ်စောင်ကိုပါ ဝယ်ယူထားရန်လိုပါသည်။ သို့မှသာ ကံအဆိုးဆုံးအနေအထားတွင်ပင် အနည်းဆုံး တစ်စောင်မှာ ပေါက်ကိန်းပါရှိမည်ဖြစ်ခြင်းကြောင့် ထီစောင်ရေ ၄ ၁၂၅ ၀၀၁ စောင်ဝယ်ယူရမည်ဟု ဖြေခဲ့ပါသည်။
ဤသည်ကို ဆရာက အမှားပေးထားခြင်းဖြစ်၏။ ထိုအတွက် မည်သည့်အမှားလုပ်ထားကြောင်း သိလိုစိတ်အလွန်ပြင်းပြလာသည်။ ကျွန်ုပ်၏အဖြေမှားကြောင်း ရှင်းပြပေးသည့်အလှည့်ရောက်သော် ထိုပုစ္ဆာအတွက်အဖြေမှန်ရခဲ့သော ကျောင်းသားတစ်ဦးအား အဖြေဖတ်ကြာပေးရန် ညွန်ကြား၏။ သူ့အဖြေကြောင့် ကျွန်ုပ်အလန့်တကြားဖြစ်သွားပါသည်။
“ ထီဆုတစ်ဆုပေါက်ကြောင်းသေချာစေဖို့ ထီလက်မှတ်အားလုံးကို ဝယ်ယူရပါမယ်။ ထီလက်မှတ်တိုင်းကိုဝယ်ယူထားမှသာ ပေါက်ဂဏန်းပါထီလက်မှတ်တစ်စောင်ကို ဝယ်ယူမိထားမှာပါ။ ”
ဟူသတတ်။
”သိပ်ကောင်းတယ်၊ မင်းပြောတာအမှန်ပဲ။ ထီတစ်စောင်အမိအရပေါက်ချင်ရင် ထီလက်မှတ်တိုင်းကို ဝယ်ဖို့လိုတယ်။ ကဲ ••• နောက်မေးခွန်းအတွက် ••• ”
ဤအဖြစ်ကို ၁၂ နှစ်အရွယ်ကောင်လေးက လက်မခံပါ။ ထိုင်ရာမှထလိုက်ပြီး
” တဆိတ်လောက်ပါခင်ဗျာ၊ အဲဒါကမှားနေပါတယ် ” ဟုပြောရင်း ဆရာအပေါ် အပြစ်ရှာမိခြင်းအတွက် မဆိုစလောက်လေးကတုန်ကယင်ဖြစ်နေမိ၏။
” ငါတော့အဲလိုမထင်ဘူး ” ဟု ဆရာလုပ်သူက ပြောပြီး ကျောက်သင်ပုန်းရှိရာဘက်ပြန်လှည့်လာသည်။
” ဒီမှာ ကျွန်တော်ပြပါ့မယ်၊ လေးပုံ ပုံ တစ်ပုံပါအတွက် လက်မှတ် ၁၂ စောင်နဲ့ကျွန်တော်ပြပါ့မယ်။ အဲဒီ ၁၂ စောင်ထဲမှာ ၃ စောင်ကပေါက်မဲပါ။ ကျွန်တော်သာ ၁၀ စောင်ဝယ်ထားလိုက်ရင် စိတ်ထင် ကံအဆိုးဆုံးဖြစ်နိုင်ချေ ၉ စောင်မှာ ပေါက်ဂဏန်းမပါခဲ့ရင်တောင်မှ တစ်စောင်မှာတော့ ပေါက်မဲ ဖြစ်ပါတယ် ”
ဆရာက ကျွန်ုပ်ကို ခေါင်းအသစ်ပေါက်လာသည့် လူတစ်ယောက်အားကြည့်သောအကြည့်မျိုးဖြင့် (တီကောင်ကဲ့သို့သော အကောင်များကို နှစ်ပိုင်းဖြတ်က တစ်ပိုင်းတွင် အမြီးအသစ်ထွက်လာပြီး ကျန်တစ်ပိုင်းတွင် ခေါင်းအသစ်ပေါ်လာလျက် တီကောင် နှစ်ကောင်ဖြစ်ပေါ်လာသည် ) ကြည့်ပြီး
” အဲဒါက ဒီပုစ္ဆာကိုဖြေရှင်းဖို့ မင်းကိုငါသင်ပေးထားတဲ့နည်းမဟုတ်ဘူး၊ ဒီမှာကြည့် ”
ဟုပြောပြီး အလားတူဥပမာဖြင့် လက်မှတ်လေးစောင်ကို သင်ပုန်းပေါ်တွင်ရေးပြလျက်
” ဒီလိုဆိုလို့ရှိရင် လက်မှတ်လေးစောင်လုံးဝယ်မှ ပေါက်မဲတစ်မဲရမယ်။ ဘာကြောင့်ဆို ပေါက်မဲတစ်မဲပဲရှိလို့ပဲ ”
ထိုအချက်မှားနေကြောင်း ကျွန်ုပ်မှ ကျောက်သင်ပုန်းဆီသွားပြီး ရောင်စုံစက်ဝိုင်းများဆွဲလျက် လက်မှတ် ၁၂ စောင်ပါဥပမာကိုပြန်ထူ၊ ၁၅ မိနစ်ကြာမျှ ရှင်းပြပါသော်လည်း ဆရာကလက်မခံပဲရှိနေခဲ့သည်။ နောက်ဆုံးမှာတော့ သူပေါက်ကွဲပါလေရော။
” အဓိပ္ပါယ်မရှိတာ၊ မင်းမှားတယ်။ ဘာကြောင့်ဆို ငါက ဆရာ။ နောက် ၅ မိနစ်အတွင်း မင်းမထိုင်ဘူး၊ ပါးစပ်မပိတ်ဘူးဆိုရင် မင်းထိန်းသိမ်းခံရမယ် ”
ကျွန်ုပ်ဘဝတစ်လျှောက် ထိန်းသိမ်းခံရသည်မရှိဖူးခဲ့ပါ။ စည်းကမ်းနှင့်မဆိုင်သည့် မှတ်တမ်းထဲတွင် အမှတ်တစ်မှတ်ရဖို့အရေးအတွက် ထိန်းသိမ်းခံရမည်၊ မိဘစိတ်ပျက်စေမည့်ဖြစ်ရပ်ကိုကြောက်ရွံ့သောကြောင့် ကျွန်ုပ်အလျှော့ပေးပြီး ထိုင်ခဲ့ပါသည်။ အခန်း၏ နောက်နားဆီမှ အသံတစ်ခုထွက်ပေါ်လာ၏။
” ဟေး စောင့်ပါဦး ••• သူမှန်တယ်ထင်တယ် •••” ဆရာက ထိုကျောင်းသား၏ စကားစကို အမြန်ပင်ဖြတ်ပစ်လေသည်။
” သူမှားတယ်၊ အခု နောက်မေးခွန်းကိုဆက်မယ် ”
ဤရှည်လျားလှသည့် အက်ဆေး၏အဆုံးတွင် နှစ်အတန်ကြာအချိန်ယူပြီးမှ တွက်ချက်ဖြေရှင်းတတ်စ ပြုလာသော သေးငယ်လှသည့် ကျွန်ုပ်၏ဦးနှောက်အား စာပေလေ့လာခြင်းနှင့် သင်္ချာကို အလွန်မုန်းတီးသွားစိတ်ပေါ်စေခဲ့သူ ထိုအမည်မသိဆရာကို ကျေးဇူးတင်မိဖို့ရာ တစ်စက္ကန့်ခန့်သာ ကျွန်ုပ်အချိန်ယူခဲ့ရဟန်တူပါသည်။ ထိုအရာကပင် အတန်းကျောင်းသားဘဝတစ်လျှောက် နှစ်ရှည်လများ နာကျင်ခံစားခဲ့ရမှု၊ အလွန်စိတ်ဒုက္ခရောက်ခဲ့ရမှုများ ဖြစ်စေခဲ့ပါသည်။
ရည်ညွန်း။ ။ Quora တွင်ပါရှိသည့် Have you ever been taught something in school that was completely incorrect? မေးခွန်းမှ Lydia Collinson ခေါ် အမျိုးသမီး၏ ဖြေကြားချက်ကို ဇာတ်ကောင်အပြောင်းအလဲလုပ်ပြီး ကျွန်တော်တိုက်ရိုက်ဘာသာပြန်ထားပါသည်။ မလိုအပ်သည်များကိုဖယ်ချန်ပြီး မြန်မာဘာသာဖြင့် ဆီလျော်အောင် ရေးသားထားခြင်းဖြစ်ပါသည်။ စိတ်ဝင်စားပါက Quora တွင် အင်္ဂလိပ်ဘာသာဖြင့် တိုက်ရိုက်ဖတ်ရှုနိုင်ပါသည်။
Bun Gon